جامبىل وبلىسىندا «دەنساۋلىق ساقتاۋ» باعىتى بويىنشا كوميسسيانىڭ وتىرىسى ءوتىپ، جيىندا وبلىس اكىمدىگىنىڭ دەنساۋلىق ساقتاۋ باسقارماسىنىڭ باسشىسى ەسەپ بەردى. مارات سەيتبەك ۇلى اتالعان سالاداعى مەديسينالىق قۇرال-جابدىقتارمەن قامتىلۋ جانە كادر ماسەلەلەرى بويىنشا باياندادى دەپ جازادى Qamshy.kz اقپارات اگەنتتىگى. 

2019 جىلدىڭ 6 ايىنىڭ قورىتىندىسى بويىنشا قاجەتتى قۇرالدارمەن جابدىقتالۋى وبلىستا 74،31 پايىزدى قۇراپ وتىر. بىلتىر جابدىقتاۋعا بيۋدجەتتەن 2،3 ميلليارد تەڭگە قارالىپ، 900-دەن اسا سايمان ساتىپ الىنعان. بيىل بۇل ماقساتتا 300-دەن اسا مەديسينالىق تەحنيكا بىرلىگى 1،7 ميلليارد تەڭگە قاراجاتقا الىنسا، الداعى ەكى جىلدا 1،1 ميلليارد تەڭگەدەن اسا سوماعا 321 بىرلىك مەديسينالىق تەحنيكا الۋ جوسپارلانعان. وسىلايشا، مەملەكەت باسشىسىنىڭ جەرگىلىكتى جەرلەردەگى ەمحانالاردى 100 پايىز مەديسينالىق قۇرال-جابدىقتارمەن قامتۋ تاپسىرماسىن ورىنداۋ كوزدەلىپ وتىر. اعىمداعى جىلدىڭ العاشقى جارتىسىندا مەد.تەحنيكانىڭ قولجەتىمدىلىگى بويىنشا جامبىل وبلىسى رەسپۋبليكادا 7ء-شى ورىندا. دەگەنمەن، ءوسۋ تەندەنسياسى بايقالادى.

دەنساۋلىق ساقتاۋ سالاسىنداعى مەديسينالىق قىزمەتتىڭ ساپاسىنا كادرلاردىڭ تاپشىلىعى تىكەلەي اسەر ەتەتىنى انىق. مەكەمەلەردىڭ تاپسىرىسى بويىنشا 322 بوس ورىن جاريالانعان بولاتىن. ونى تولتىرۋ ماقساتىندا رەسپۋبليكادان 185 جاس مامان جولدانعانىمەن، ءالى دە 130-دان اسا مامان قاجەتتىلىگى تۋىنداۋدا. باسقارما مۇنى ءوز بەتىمەن كەلەتىن وقۋ ورىندارىنىڭ تۇلەكتەرىمەن تولىقتىرۋدى جوسپارلاپ وتىر.

باسقارما تاراپىنان وبلىسقا قانداي ماماندار قاجەتتىلىگى زەردەلەنىپ، ناتيجەسىندە اكۋشەر-گينەكولوگ، انەستەزيولوگ-رەانيماتولوگ، نەوناتولوگ ماماندىقتارى ايقىندالدى. وسىنى ەسكەرە وتىرىپ وبلىستىق بيۋدجەتتەن 8،7 ميلليون.تەڭگە ءبولىنىپ، 9 ماماندى وقىتۋ جوسپارلانۋدا.

مامان تارتۋ ءۇشىن الەۋمەتتىك جاعدايدىڭ دا ماڭىزى زور. بۇل ماقساتتا بيىل جاس ماماندارعا 100 000-800 000 تگ دەيىن الەۋمەتتىك كومەك ءتۇرىن كورسەتۋ جوسپارلانعان. سونداي-اق، تۇرعىن ءۇي ساتىپ الۋ نەمەسە سالۋ ءۇشىن 1500 اەك اسپايتىن نەسيە، 100 اەك تەڭ سومادا كوتەرمە جاردەماقى كوزدەلگەن.

جيىن سوڭىندا كوميسسيا مۇشەلەرى مەديسينا سالاسىنىڭ وڭىردە دامۋى مەن كەمشىلىكتەرگە جول بەرىلمەۋى ماقساتىندا ءبىرقاتار ۇسىنىستار بەردى. ونىڭ ىسكە اسۋى مەن قاداعالاۋ پارتيا باقىلاۋىندا بولادى.